فعلا لقيت دي الاغنية المناسبة جدا في الوقت المناسب...زمان وأنا كنت صغير كنت بحب اسمع الاوبريتات اللي كانت بتذاع علي التلفزيون المصري ومش فاهم غير ان في مطربين وممثلين وناس كثيرة اوي بيغنوا وهوب يروحوا كلهم جري عشان يسلموا علي الريس بعد الأوبريت ما يخلص من اول اخترناك..وأول طلعة جوية..وتلاقي محمد ثروت واقف بيغني وتلاقي صفاء أبو السعود بتغني بحماس جدا وتقول اول طلعة جوية فتحتنا بالحرية ولا وهي بتقول ادي ادي اديها كمان حرية. ولنا وقفة مع الحرية دي بالذات..بصراحة كنت ببقي زي العبيط وانا قاعد اتفرج علي الاغنية دي واتطنط وانا مش فاهم حاجة...بس فعلا اكتشفت ان الاغنية دي سابقة لأونها بكثير...وفهمتها ...فهمتها صح اوي بس متاخر فاهمتها مع المعتقلين اللي كل يوم عددهم بيزيد في الاعتقالات...فهمتها مع الخوف والرعب جوا أهالينا لما نكلم في السياسية..فهمتها مع تطورات النظام وتصفية المعارضين وتصفية كل اللي يقول بخ من أيمن نور والسادات وطلبة الأزهر وأعضاء كفاية والأخوان وكل واحد بيفكر انه يتعترض أو حتي يقول لا حتي المدونين اللي اتحبس منها كريم عامر بتهمة إهانة رئيس الجمهورية" و "إظهار مظاهر غير لائقة قد تضر بسمعة مصر"....وحتي رؤساء تحرير الصحف المعارضة للفساد برضة بيتم تصفيتهم عن طريق القضايا...اكتشفتها مع قانون حماية الأرهاب الجديد اللي هيتقرر وفي قانون الطوارئ بالرغم أصلا أن الدستور فيه 18 بند مختصين بمكافحة الارهاب وما اكتفوش وادوها كمان حرية وطبقوا قانون الطؤاري وادوها حرية اكثر وهيطبقوا قانون مكافحة الأرهاب وبما أننا بنكلم عن الحرية وبجد عشان نقدر نديها كمان حرية بيقرروا التعديلات الدستورية الجديدة..وهتمرر كمان في مجلس الشعب عشان الحرية الزيادة اللي عندنا دي ...وكل اللي هيقول اديها كمان حرية مش هيحرموه من الحرية وهتبقي الحرية بزيادة عشان نشبع منها ...الحرية اللي هتخلينا من كثرها بنشتكي وهنسيب البلد عشان مش قادرين نتواصل مع الحرية دي ..الحرية اللي من جمايلها علينا مابقناش عارفين ناكل من الخير اللي احنا عايشين فيه...الحرية اللي فيها شبعنا وغرقنا منها...الحرية...ااااه علي الحرية ده حتي الناس في اشتكت من الضرب علي القفا من كثر الحرية والشباب اشتكوا من كثر الشغل وقعدوا علي القهوة ومش عايزن يشتغلوا ولا حتي عايزن يتجوزا مش عشان ظروف اقتصادية لاقدر الله ولا حاجة ده احنا عايشن عيشة فل بس عشان الحرية الزيادة ..ماهي دي مشكلتنا من كثر الحرية مش عارفين نعمل ايه تاني..يعني خلاص الناس قربت تهج مش قادرة علي الحرية دي كلها يعني الناس اتحرمت من كل حاجة مقابل الحرية دي ...قرروا يحرموا نفسهم من الأكل والشرب والشغل والجواز وكل حاجة إلا الحرية دي أهم حاجة عندنا ومش ملاحقين بعد كدة علي الحرية دي. ...مش ملاحقين علي نفسنا من ولا اللي بيحصل فينا من كثر إحساسنا بالحرية إللي احنا عايشن فيها دي...أرجوكم باسم سبعين مليون مواطن كفاية بقي حرية الرحمة حلوة...وبطلوا بقي تدوها كمان حرية
